नीलजईत अवैध रेती साठ्याची कारवाई; 41 ब्रास रेती घरकुल धारकांना वाटप..
चंद्रपुर/महाराष्ट्र
दि. 19 डिसेंबर 2024
रिपोर्ट :- मोहित हिवरकर, ग्लोबल महाराष्ट्र न्यूज नेटवर्क
वरोरा, नीलजई: नीलजई (ता. वरोरा) येथे उपविभागीय अधिकारी जेनीत चंद्रा, तहसीलदार योगेश कोटकर यांच्या आदेशाने अवैध रेती साठ्यावर मोठी कारवाई करण्यात आली. या कारवाईत जप्त करण्यात आलेल्या 41 ब्रास रेतीचे घरकुल धारकांना वाटप करण्यात आले. या निर्णायक कारवाईमुळे गावात रेती माफियांचे धाबे दणाणले असून, तलाठी अतुल वडस्कर यांच्या कार्याचे सर्वत्र कौतुक होत आहे.
अवैध साठ्यावर कारवाई
अवैध रीत्या साठवलेली रेती प्रशासनाच्या रडारवर आली होती. मंडळ अधिकारी रणजित बऱ्हानपुरे, तलाठी अतुल वडस्कर आणि पोलीस पाटील झपाटे यांच्या टीमने नियोजनपूर्वक कारवाई करत मोठ्या प्रमाणावर साठवलेली रेती जप्त केली. यामध्ये 41 ब्रास रेतीचा समावेश होता, जी नंतर घरकुल धारकांना वाटप करण्यात आली.
घरकुल धारकांचा दिलासा
घरकुल योजनेअंतर्गत लाभ घेणाऱ्या धारकांना या रेती वाटपामुळे मोठा दिलासा मिळाला आहे. या योजनेमुळे अनेक कुटुंबांचे बांधकाम पूर्ण होण्याचा मार्ग मोकळा झाला आहे.
गावात कौतुक आणि माफियांना धडकी
तलाठी अतुल वडस्कर यांच्या कामगिरीचे गावात सर्वत्र कौतुक होत आहे. रेती माफियांचे साम्राज्य मोडीत काढण्यासाठी प्रशासनाने उचललेले हे पाऊल महत्त्वपूर्ण ठरत आहे. या कारवाईमुळे गावातील अवैध रेती तस्करीला आळा बसण्याची शक्यता आहे.
प्रशासनाची कठोर भूमिका
उपविभागीय अधिकारी जेनीत चंद्रा आणि तहसीलदार योगेश कोटकर यांनी या प्रकरणात कडक भूमिका घेतली आहे. अवैध रेती साठ्यांवर अशा प्रकारच्या कारवाया भविष्यातही सुरू राहतील, असा विश्वास व्यक्त केला जात आहे.
